Me ndërmjetësimin e përfaqësuesit të kompanisë Metso Minerals me seli në Shkup, z. Viktor Sotarovski, delegacioni i përbërë nga z. Ferat Shala, menaxher i ndërmarrjes Trepça, drejtorët e minierave Stantërg dhe Artanë: z. Beqir Maliqi, z. Selim Frangu dhe z. Halil Qela, këshilltar i menaxherit, kanë qëndruar një ditë në minierën me flotacion Sase në jug-lindje të Maqedonisë.

Gjatë vizitës në këtë minierë nëntokësore, vizitorët nga Mitrovica u njohën me metodat e eksploatimit të xehes, hapjen e horizonteve të reja, gjeologjinë e trupave xeheror, largimin e ujërave nëntokësor etj. Më pas, vizita ka vazhduar në fabrikën e pasurimit-flotacionin, ku kompania Metso Minerals ka ndërruar sistemin e flotimit nga ai i hapur, siç janë tash në Trepçë, në një sistem të mbyllur dhe plotësisht të digjitalizuar dhe funksional, përmes sistemit automatik të furnizimit me reagensë kimik. Ky ndërrim i sistemit, ka bërë të mundur që të rritet përqindja e metalit në koncentrat mbi 10% në krahasim me metodën e mëhershme. Ata, po ashtu, kanë vizituar edhe repartin e tharjes, i cili në mënyrë automatike lejon të kaloj vetëm koncentrati i cili ka lagështirë nën 6%.

Veç tjerash, delegacioni nga Kosova u njoh edhe me kushtet e punëtorëve, mbrojtjen e ambientit, deponit e sterilit etj.

Menaxheri i ndërmarrjes Trepça, z. Ferat Shala, ka pritur zyrtarët e Bankës Botërore për rajonin e Evropës Qendrore dhe Azisë, të përfaqësuar nga: Frank van Woerden, specialist i lartë i ambientit për zhvillim të qëndrueshëm, MSc. Jochem Jantzen, Instituti për Ekonominë e Aplikuar në Ambient dhe Katelijin Van den Berg, specialiste e lartë për ambient dhe zhvillim të qëndrueshëm.

Fillimisht, menaxheri i ndërmarrjes Trepça z. Ferat Shala, mysafirëve të BB-së, shkurtimisht ua bëri një prezantim të shkurtër rreth së kaluarës, gjendjes së tanishme dhe vizionit për të ardhmen e kësaj ndërmarrje. Ai po ashtu, mysafirëve u foli edhe për veprimtarinë që aktualisht zhvillon Trepça, sukseset që janë arritur, por edhe për vështirësitë me të cilat po përballet ndërmarrja.

Ndërkaq, përfaqësuesja e BB, znj. Katelijin Van den Berg, nga ana e saj, sqaroi se qëllimi i këtij takimi është hulumtimi i mundësive për realizimin e projekteve studimore në fushën e mjedisit, për ta konstatuar shkallën e ndotjes. Këto projekte do të financoheshin nga Banka Botërore.

Menaxheri i Trepçës u tregoi zyrtarëve të BB-së për hulumtimet e deritanishme të realizuara, projektet mjedisore që janë të gatshme për implementim, por që presin ndihmën e donatorëve të ndryshëm, pasi që aktualisht ndërmarrja nuk mund ta përballoi një barrë kaq të rëndë të problemeve mjedisore. Po ashtu, ai u tregua i gatshëm për bashkëpunim, duke iu ofruar specialistët e ndërmarrjes Trepça dhe gjitha informacionet për shkallën e ndotjes dhe problemet e shumta mjedisore.

Në kuadër të bashkëpunimit në mes të ndërmarrjes Trepça dhe UNDP-së, kjo e fundit po realizon një projekt për ndërtimin e argjinaturës në deponinë e sterilit në minierën e Artanës.

Argjinatura ka për qëllim mbrojtjen e lumit të Marecit nga ndotjet që shkaktohen nga mbetjet minerare që janë grumbulluar gjatë dekadave të punës së kësaj miniere dhe po ndërtohet me material argjilor, që është izolator i mirë i ujërave nëntokësore.

Ky projekt është financuar nga UNDP, punët është duke i kryer kompania vendore Asfalt, ndërkaq, materiali mbushës, përkatësisht argjila është siguruar nga ndërmarrja Trepça.

Menaxheri i ndërmarrjes Trepça, z. Ferat Shala, priti në një takim rasti punonjësit shkencor të Institutit Albanologjikë të Kosovës, prof. Mehmet Halimi, prof. Daut Bislimin dhe prof. Adem Zejnullahun.

Në këtë takim, profesorët e informuan z. Shala për themelimin e Shoqatës së Dhurueseve të gjakut në Kosovë. Misioni dhe qëllimi i kësaj shoqate pos tjerash, është masivizimi i këtij akti human në të gjitha shtresat e shoqërisë sonë, ndërgjegjësimi i përgjithshëm i popullatës për rëndësinë e dhurimit të gjakut, bashkëpunimi me organizma relevante shtetërore që merren me dhurimin e gjakut etj.

Menaxheri Shala i përgëzoi përfaqësuesit e shoqatës, duke e çmuar rëndësinë e humanizmit të këtij akti për të shpëtuar jetë njerëzish.
Në këtë takim, minatorit të minierës Trepça, kampionit të dhurimit të gjakut në Kosovë, z. Billall Neziri, në emër të menaxhmentit të ndërmarrjes, i dha një mirënjohje, me motivacion: për humanizmin e rrallë si dhurues vullnetar i gjakut, për shpëtimin e shumë jetëve njerëzore.